Топлотните бранови во Белгија ова лето биле поврзани со илјадници дополнителни смртни случаи, покажува анализата на јавно-здравствената установа „Сиенсано“. Во периодот од 18 јуни до 16 август биле регистрирани 2.935 повеќе смртни случаи од очекуваното, што претставува зголемување на смртноста за 22,6 отсто.
Најтежок бил периодот од 18 јуни до 3 јули, кога Белгија регистрирала 2.035 дополнителни смртни случаи, односно смртност за 48,8 отсто повисока од очекуваното. Според „Сиенсано“, тоа е највисоката смртност забележана за време на топлотен бран откако во 2000 година започнале систематските анализи.
Од 18 јуни, највисоките температури достигнувале околу 30 степени Целзиусови во десет последователни денови. Во три од тие денови температурата се искачила на околу 35 степени, а периодот бил проследен и со невообичаено топли ноќи.
Уште два топлотни бранови биле регистрирани во текот на летото. Од 4 до 17 јули биле забележани 535 дополнителни смртни случаи, што претставува зголемување од 14,8 отсто, додека од 28 јули до 16 август имало 365 повеќе смртни случаи, односно седум отсто над очекуваното.
Најголем дел од смртните случаи поврзани со високите температури се кај лицата на возраст од 65 и повеќе години. Сепак, „Сиенсано“ предупредува дека зголемена смртност се забележува и кај помладите лица, што покажува дека екстремните температури претставуваат ризик за поширок дел од населението.
Европа ова лето беше погодена од повеќе топлотни бранови. Светската метеоролошка организација предупреди дека периодите на екстремна топлина стануваат сè почести, поинтензивни и подолготрајни.
