Белгија ја одложува забраната за пушење на терасите на кафулињата и рестораните

Пушачите во Белгија ќе можат подолго да палат цигари на терасите на кафулињата и рестораните откако владата одлучи да ја одложи забраната за пушење на отворено, која требаше да стапи во сила на 1 јануари 2027 година.

— реклама —

Забраната беше дел од мерките за заштита на јавното здравје, за кои се залага социјалдемократскиот министер за здравство, Франк Ванденбруке. Сепак, белгискиот Државен совет побара приспособување на одредени мерки, поради што е одлучено да се одложи примената на новите правила.

— реклама —

Од кабинетот на министерот соопштија дека одложувањето ќе им овозможи на угостителите да добијат доволно време за приспособување. Најавата за забраната претходно наиде на противење од угостителскиот сектор.

Слични ограничувања воведуваат и други земји од Европската Унија. Франција неодамна забрани пушење на плажите, во парковите и во близина на училиштата, додека Шпанија во јули одобри предлог-закон за проширување на забраната на терасите и на други јавни места, вклучително и ограничувања за електронските цигари.

— реклама —

Белгија минатата година воведе и други мерки против пушењето, меѓу кои ограничувања на аеродромите и забрана за електронски цигари со ароми, со цел до 2040 година да создаде „генерација без пушење“.

Според белгиската фондација за борба против ракот, речиси една четвртина од населението пуши, а 19 отсто од граѓаните пушат секојдневно. Засега не е познато колку долго ќе биде одложена забраната за пушење на отворено.