По седумдневна борба со огнената стихија, најголемиот шумски пожар во Белгија во последните сто години е ставен под контрола. Пожарот избувна во природниот резерват „Хај Фенс“, во близина на германската граница, а на терен и понатаму остануваат околу 350 пожарникари и припадници на итните служби.
Од канцеларијата на локалниот гувернер соопштија дека пожарот во моментов не би требало дополнително да се шири, но предупредија дека ситуацијата зависи од временските услови и од други непредвидливи околности.
Огнот зафатил огромна површина од резерватот, при што изгореле делови од тресетиштата, боровите шуми и пешачките патеки. Силниот ветер дополнително го отежнувал гаснењето, а во регионот бил регистриран и помал торнадо.
Западниот дел од пожарот е целосно изгаснат, додека на источната страна продолжуваат интервенциите. Во акцијата се вклучени седум авиони од Германија, Норвешка, Белгија и Шведска, кои фрлаат вода врз рабовите на пожариштето и околниот терен, каде што температурите на почвата и натаму се високи.
По завршувањето на воздушните интервенции, состојбата ќе ја следат беспилотни летала на цивилната заштита, кои ќе бараат можни нови жаришта. Властите предупредуваат дека ќе бидат потребни недели, а можеби и месеци, за натопување на теренот со цел да се спречи повторно избувнување на пожарот.
Во меѓувреме, укинати се наредбите за евакуација во пограничниот регион, па жителите на неколку белгиски населби и еден град од германската страна добија дозвола да се вратат во своите домови.
Причината за пожарот засега не е утврдена. Според информациите од властите, огнената стихија избувнала во подрачје кое било погодено од големи пожари и во 1911 година, исто така за време на топлотен бран.
