Студентските протести во Белгија ескалираа: Пожари, искршени излози и над 100 уапсени

Стотици студенти излегоа на улиците на белгискиот град Лиеж, на истокот од земјата, во близина на границата со Германија и Холандија.

Протестите делумно се поттикнати од немирите во образовниот сектор во соседна Франција, а локалните медиуми јавуваат дека во последните денови се уапсени 107 лица.

Локалните власти засега не го потврдиле бројот на уапсените, но белгиската новинска агенција „Белга“ пишува дека апсењата се поврзани со кривични дела како уништување имот и подметнување пожари.

— реклама —

Студентите протестираат против образовниот систем во француското говорно подрачје на Белгија. Како главни проблеми ги наведуваат сè повисоките трошоци за образование, преполните училници и отежнатиот пристап до наставни материјали.

Демонстрантите носеле транспаренти со пораки: „Ситуацијата е хаотична, се бориме за нашите права!“ и „Избрав образование, а не Игрите на гладните!“.

— реклама —

Немирите следуваат по судирите меѓу демонстрантите и полицијата во Брисел во јуни, поврзани со реформите во образованието.

— реклама —

Меѓу предвидените мерки е и зголемување на школарината за повеќето студенти во француското говорно подрачје на Белгија – од 835 на 1.194 евра.

На снимките кои во последните денови се шират на социјалните мрежи се гледаат искршени излози и прозорци, пожари и стотици, главно млади, демонстранти на улиците во Лиеж.

На други снимки се гледа полицијата како блокира сообраќајници.

— реклама —

Полицијата денеска за време на протестите ги претресувала студентите во потрага по оружје.

Некои студенти за „Ројтерс“ изјавиле дека се во контакт со свои колеги од Франција.