Топлотните бранови предизвикуваат повеќе смртни случаи кај жените отколку кај мажите, но научниците предупредуваат дека причината не треба да се бара првенствено во биолошките разлики, туку во возраста, животните околности и општествените фактори.
Анализа на податоци за смртност од 35 европски земји за време на екстремно жешкото лето во 2022 година покажала дека бројот на смртни случаи поврзани со високите температури бил за 56 проценти поголем кај жените. Сличен тренд е забележан и ова лето во Германија, каде што Институтот „Роберт Кох“ до средината на јули регистрирал речиси 9.800 смртни случаи поврзани со жештините, при што повторно преовладуваат жените.
Според институтот, ова во голема мера се должи на фактот што жените живеат подолго и се побројни во најстарите возрасни групи, кои се најранливи на екстремно високи температури.
Иако често се тврди дека жените потешко ја поднесуваат жештината поради хормоните, помалото потење или поголемиот процент на телесни масти, експертите велат дека ваквите објаснувања се претерани.
Александра Шнајдер од Институтот „Хелмхолц“ во Минхен истакнува дека научните истражувања покажуваат само мали физиолошки разлики меѓу половите кога станува збор за поднесувањето високи температури. Најголем ризик имаат постарите жени, особено оние со срцево-садови заболувања, но, според неа, нивните животни услови и општественото опкружување имаат далеку поголемо влијание од биологијата.
Сличен став има и професорот Тоби Миндел од Универзитетот „Брок“ во Канада, кој смета дека возраста, физичката подготвеност, телесната градба и секојдневната активност се многу поважни фактори од полот. Иако жените се потат помалку, нивниот организам поефикасно ја пренесува топлината преку ширење на крвните садови, што овозможува подобро ладење на телото.
Миндел додава дека и кај бремените жени често постојат погрешни претпоставки. Според него, организмот во текот на бременоста подобро се приспособува на топлината, иако екстремните горештини и натаму претставуваат ризик доколку жените извршуваат тешка физичка работа.
Истражувачот Лори Парсонс од Универзитетот „Ројал Холоуеј“ во Лондон смета дека клучната причина за повисоката смртност е начинот на кој се организираат работата и секојдневниот живот. Неговите истражувања покажуваат дека жените во одредени сектори, како градежништвото, текстилната индустрија и земјоделството, поминуваат значително повеќе време изложени на опасни температури отколку мажите.
Дополнително, по завршувањето на работниот ден, многу жени продолжуваат со домашни обврски и грижа за семејството, што им остава помалку време за одмор и закрепнување.
Парсонс нагласува дека топлотниот стрес не е само последица на временските услови, туку и на општествените околности, поради што е неопходно да се подобрат условите за работа и заштитата на најранливите категории население за време на екстремните горештини.
