Силното невреме што завчера го погоди Детроит, во американската сојузна држава Мичиген, официјално е потврдено како торнадо – првото што го погодило градот по речиси три децении.
Торнадото минало низ источниот дел на Детроит, при што биле оштетени илјадници домови и деловни објекти, а биле соборени и стотици дрвја и далноводи. Националната метеоролошка служба испрати тимови за процена на штетата на подрачјето од Хамтрамк, преку Детроит, до островот Бел Ајл.
Градоначалничката Мери Шефилд потврди дека метеоролозите утврдиле дека низ источниот дел на градот поминало торнадо. Неговата јачина и точната патека сè уште треба да бидат објавени.
Невремето оставило оштетени покриви и фасади, искршени автомобили и блокирани улици. Големи дрвја паднале врз куќи, возила и електрични водови, а градските служби започнале со расчистување на најпогодените подрачја. Засега нема информации за загинати или потешко повредени лица.
До петокот наутро, повеќе од 250.000 домови и деловни објекти во Мичиген останале без електрична енергија. Енергетската компанија ДТЕ ангажирала околу 3.400 работници, вклучително и екипи од други сојузни држави, за санација на оштетената мрежа.
По два дена, денеска било соопштено дека 95 отсто од корисниците што останале без струја повторно добиле електрична енергија.
