„Тошковски го штити кумашинот Јанушев“, вели СДСМ

СДСМ преку соопштение побара проширување на истрагата за случајот со возачот на генералниот секретар на Владата, Игор Јанушев, кој, според јавно објавените информации, бил приведен при примопредавање пари за наводно посредување при вработување пожарникар.

Од СДСМ тврдат дека биле побарани 1.500 евра, а при полициската акција биле предадени 500 евра. Од партијата прашуваат зошто истрагата, според нив, застанала кај непосредниот посредник и зошто не било овозможено парите да продолжат по трагата за да се утврди кој стои зад целата постапка.

— реклама —

СДСМ оценува дека возачот сам не може да обезбеди вработување пожарникар, да влијае врз конкурсот или да донесе одлука за избор на кандидат. Од партијата посочуваат дека Јанушев, како генерален секретар на Владата и член на Извршниот комитет на ВМРО-ДПМНЕ, располага со значително поголемо институционално и политичко влијание.

— реклама —

„Дали Панче Тошковски го спаси својот кумашин Јанушев?“, прашуваат од СДСМ, повикувајќи ги Јавното обвинителство и надлежните институции да објаснат зошто, како што тврдат, акцијата била прекината пред да се утврди целосниот тек на парите и евентуалната вмешаност на други лица.

Од СДСМ го споредуваат случајот и со истрагата поврзана со ИПАРД, при која беше уапсен директорот на Агенцијата за финансиска поддршка во земјоделството и руралниот развој. Според опозициската партија, и тогаш јавноста не добила целосни одговори за тоа каде водела трагата на парите и дали биле опфатени сите можни учесници.

— реклама —

Од СДСМ велат дека и во актуелниот случај е потребно да се утврди дали постојат други лица кои биле вклучени во наводното посредување.

Партијата бара да се отвори истрага која би го опфатила целиот случај, вклучително и евентуалната поврзаност со Јанушев.

„Граѓаните заслужуваат одговори. Одговорност мора да има“, порачаа од СДСМ.