Тошковски на средба со регионалниот претставник на UNODC Данило Рици: Ја продлабочуваме соработката во борбата против недозволената трговија со дрога

Продлабочување на соработката во борбата против недозволената трговија со дрога и психотропни супстанции било тема на денешната средба меѓу министерот за внатрешни работи Панче Тошковски и Данило Рици, регионален претставник на Канцеларијата на Обединетите нации за дрога и криминал (УНОДЦ) за Југоисточна Европа.

На средбата било разговарано и за зајакнување на капацитетите на Министерството за внатрешни работи, при што била нагласена потребата од користење меѓународни искуства и добри практики, експертска поддршка и координиран пристап кој ги поврзува полициското постапување, превенцијата и институционалната соработка.

— реклама —

„Борбата против недозволената трговија со дрога бара силни институции, добро обучени полициски службеници и истражители и современи истражни капацитети“, истакна Тошковски.

Министерот ја нагласи важноста на соработката со УНОДЦ, особено во делот на истрагите, следењето на финансиските текови поврзани со криминалот и одземањето на незаконски стекнатиот имот.

— реклама —

На средбата била поздравена и поддршката што УНОДЦ, заедно со Амбасадата на САД, ја обезбедува за спроведувањето на Националната стратегија за дроги.

Во следните четири дена во Полициската академија ќе се одржи специјализирана обука за истраги поврзани со дрога. Обуката ќе ја опфати истрагата и кривичното гонење, финансиските истраги, одземањето имот и примената на посебни истражни техники.

— реклама —

Тошковски посочи дека борбата против организираниот криминал поврзан со дрога не завршува со полициска акција и заплена, туку истрагите треба да ги опфатат и финансиските текови и имотната корист стекната со криминал.

„Целта не е само да ја откриеме дрогата и сторителите. Мора да ги следиме парите, да го откриваме и одземаме имотот стекнат со криминал и да ги користиме сите законски механизми што ни стојат на располагање“, потенцираше Тошковски.

На средбата била изразена подготвеност соработката меѓу МВР и УНОДЦ да продолжи и во наредниот период преку експертска поддршка, обуки и размена на меѓународни искуства.

Рици ги претставил проектните активности и работата на УНОДЦ, при што истакнал дека Министерството за внатрешни работи е значаен и кредибилен партнер во спроведувањето на проектите на организацијата.