„Тотален распад и институционален колапс“: СДСМ ја нападна Владата за здравствените кризи

СДСМ излезе со остра реакција на обвинувањата од ВМРО-ДПМНЕ поврзани со модуларната болница во Тетово, тврдејќи дека премиерот Христијан Мицкоски и неговата партија веќе пет години ја злоупотребуваат трагедијата за политичка пресметка со претседателот на СДСМ, Венко Филипче.

На прес-конференција, советничката во Град Скопје Кети Штерјова рече дека против Филипче се водела, како што ја нарече, „монструозна кампања“ исполнета со лаги, конструкции и навреди.

„Пет години ВМРО и Мицкоски водат монструозна кампања против Венко Филипче со злоупотреба на трагедијата во модуларната болница во Тетово и болката на семејствата на загинатите“, рече Штерјова.

— реклама —

Таа тврди дека ниту Филипче ниту СДСМ во изминатите години не се мешале во работата на Јавното обвинителство, не вршеле притисок и не барале политичка заштита.

„Институциите мора да работат независно и без притисок“, порача Штерјова.

Од СДСМ велат дека модуларните болници биле набавени преку меѓународна постапка на Светската банка и дека биле поставувани во период на најтешката фаза од ковид-кризата, кога здравствениот систем бил под огромен притисок.

— реклама —

„Тие болници не се градеа за тендерски профит, туку за да се спасуваат животи“, рече Штерјова.

Според неа, доколку постоела основа за кривична одговорност на Филипче, актуелната власт, која веќе две години ги контролира институциите на извршната власт, ќе ја искористела.

— реклама —

Таа остро ја критикуваше реториката што ВМРО-ДПМНЕ ја користела кон Филипче во изминатите години, посочувајќи дека бил нарекуван „убиец“ и „д-р Менгеле“.

„Тоа е дел од кампањата на ВМРО и Мицкоски за ширење омраза и поделби“, рече Штерјова.

Од СДСМ тврдат и дека оваа кампања потоа била пренесена преку медиуми блиски до ВМРО-ДПМНЕ, што партијата го оценува како организиран политички линч.

Штерјова побара ВМРО-ДПМНЕ и Мицкоски да им се извинат на граѓаните за, како што рече, пет години манипулации, но особено на семејствата на загинатите во пожарот.

„Пет години нивната најголема болка ја претвораат во политичка кампања и бесрамно си поигруваа со нивната болка“, рече таа.