Едно лице го загуби животот, а осум лица се повредени во тешка сообраќајна несреќа што се случила околу полноќ во близина на Младеновац, пренесува српскиот „Блиц“.
Според првичните информации, во несреќата учествувале автомобил „ауди“ и автобус. Возачот на автомобилот, 42-годишниот М.Ј., починал на местото на несреќата, додека возачот на автобусот и седум патници биле повредени и итно пренесени во Ургентниот центар.
Се претпоставува дека до несреќата дошло кога возачот на „аудито“, од засега непознати причини, преминал во спротивната сообраќајна лента и директно се судрил со автобусот.
Од силината на ударот автомобилот излетал од коловозот и удрил во бетонската ограда покрај патот. Возилото било целосно уништено.
Припадниците на итната медицинска помош и надлежните служби го извлекле возачот од автомобилот, но за него немало спас. Точните околности и причините за несреќата допрва треба да бидат утврдени.
