Едно дете е пронајдено мртво, додека две деца и жена се во критична состојба по напад со нож во австралиската сојузна држава Нов Јужен Велс, соопшти полицијата.
Итните служби попладнево биле повикани на улицата „Варата“ во Вали Хајтс, населено место во областа Блу Маунтинс. Во автомобилот биле пронајдени жена и три деца со убодни рани. Едно од децата било мртво, објави „Гардијан“, повикувајќи се на полицијата.
Полицијата соопшти дека минувачи први им притекнале на помош на повредените и ги повикале итните служби.
Според полицијата, неколку граѓани ѝ пружиле прва помош на жената и на трите деца пред да пристигнат екипите на итната помош.
Медицинските екипи ги згрижиле двете преживеани деца, за кои се верува дека се помлади од пет години, како и жената, која е во четириесеттите години.
Децата биле пренесени во Детската болница Вестмид, додека жената била пренесена во болницата Вестмид. Сите тројца се во критична состојба.
Полицијата го обезбедила местото на настанот и започнала истрага за да се утврдат околностите на нападот.
Од полицијата соопштиле дека во оваа фаза од истрагата не трагаат по други лица поврзани со случајот.
Засега не се објавени дополнителни информации за тоа што се случувало пред жената и децата да бидат пронајдени.
Полицијата ги повика сите кои имаат информации за настанот, како и снимки направени со мобилни телефони или камери од возила, да се јават кај истражителите.
