Трагедија во Британија: Загина машиновозач, 89 повредени во судир на два воза

Мирното попладне во близина на Бедфорд за неколку секунди се претворило во сцена на хаос и паника, откако два патнички воза директно се судриле на една од главните железнички линии во Англија. Во трагедијата загинал еден машиновозач, а 89 лица биле повредени.

Од повредените, 11 се здобиле со критични повреди, 22 биле сериозно повредени, додека 56 патници поминале со полесни повреди.

— реклама —

Несреќата се случила во петокот попладне во близина на Кемпстон Хардвик, кога воз што сообраќал од Корби кон Лондон удрил во задниот дел на друга композиција која патувала од Нотингем кон главниот град. Двата воза биле дел од железничката компанија „Ист Мидлендс Рејлвеј“.

Очевидци сведочат за силен удар, по кој патниците биле исфрлени од седиштата, а во вагоните настанале паника и хаос. Најмалку еден вагон излетал од шините.

— реклама —

На местото веднаш биле испратени десетици спасувачи, повеќе од 20 амбулантни возила, шест воздушни амбуланти, пожарникари и полициски екипи. Во спасувачката операција учествувале околу 50 пожарникари.

— реклама —

Поради сериозноста на инцидентот, британските власти прогласиле голем инцидент, а железничкиот сообраќај на главната линија меѓу Лондон, Бедфорд, Нотингем, Дерби и Шефилд бил целосно прекинат.

Британскиот премиер Кир Стармер изрази сочувство до семејството на загинатиот машиновозач и поддршка за повредените и нивните семејства.

Истражители од надлежната агенција за железнички несреќи веќе се на терен и започнаа истрага за причините за судирот. Засега не се соопштуваат детали за можните причини, а надлежните порачаа дека ќе бидат анализирани сигнализацијата, движењето на возовите и податоците од системите за контрола.

Според британските медиуми, ова е една од најсериозните железнички несреќи во Велика Британија во последните дваесет години, според бројот на тешко повредени патници.