Трагедија во Германија: Четворица тинејџери мопедисти загинаа откако автомобил удрил во нив

Четворица млади луѓе ги загубија животите во тешка сообраќајна несреќа во германската покраина Бранденбург, откако автомобил удрил во три мопеди. Несреќата се случила во средата вечерта на патот меѓу Бизентал и Вулвинкел.

— реклама —

Според првичните сознанија на германската полиција, 61-годишниот возач на автомобилот се обидел да претекне неколку возила. При маневарот навлегол во спротивната лента, каде што се движеле четири мопеди, при што удрил во три од нив.

На местото на несреќата животот го загубиле тројца мопедисти, на возраст од 15, 16 и 19 години, како и 14-годишна девојка, која била сопатничка на еден од мопедите. Четвртиот мопедист успеал да го избегне директниот удар.

— реклама —

По судирот, автомобилот се запалил, излетал од патот и завршил превртен во канал покрај коловозот. Пожарникари, полиција и екипи на итната медицинска помош веднаш пристигнале на местото, но за четворицата млади лица немало спас.

— реклама —

Патот бил целосно затворен во текот на ноќта, додека надлежните служби вршеле увид и ги истражувале околностите што довеле до несреќата.

На местото пристигнале и семејствата на загинатите, на кои им била обезбедена психолошка помош. Поддршка била обезбедена и за припадниците на спасувачките екипи, кои учествувале во интервенцијата.

Германските власти сè уште не ги соопштиле имињата на загинатите. Постапката за нивна идентификација е во тек.