Трагедија во Јужна Африка: Почина репрезентативец кој настапи на Мундијалот

Јужноафриканскиот репрезентативец Џејден Адамс почина на 25-годишна возраст, само неколку недели по настапот на Светското првенство 2026, пренесуваат локалните медиуми.

— реклама —

Играчот од средниот ред на Мамелоди Сандаунс беше дел од репрезентацијата на Јужна Африка на Мундијалот, каде што настапи на три натпревари. Тој беше стартер на првите два дуела против Мексико и Чешка, а во победата над Јужна Кореја влезе од клупата за резерви. Последниот натпревар на неговата репрезентација беше осминафиналниот дуел против Канада, на кој не настапи.

— реклама —

Помалку од еден ден пред да биде објавена веста за неговата смрт, Адамс на социјалните мрежи сподели фотографија со својата девојка Акуила, а веста за неговото ненадејно заминување предизвика бројни реакции и пораки на сочувство од фудбалската јавност.

Со емотивно соопштение се огласи и Синдикатот на јужноафриканските фудбалери, кој истакна дека Адамс бил исклучителен талент, посветен спортист и млад човек со голема иднина.

— реклама —

„Неговото заминување претставува огромна загуба за неговото семејство, соиграчите, клубовите, фудбалската заедница и целата земја. Изразуваме најискрено сочувство до неговото семејство, Мамелоди Сандаунс, Стеленбош, репрезентацијата на Јужна Африка и до сите што имаа чест да го познаваат“, наведоа од САФПУ.

Адамс минатото лето премина од Стеленбош во Мамелоди Сандаунс, а за репрезентацијата на Јужна Африка дебитираше во 2024 година. Во националниот дрес забележа девет настапи.