Трагедија во хрватско училиште: Деветгодишник почина за време на училишен оброк, се загрцнал со парче крофна

Училиштето од подрачјето на Велика Горица, во кое вчера почина деветгодишен ученик, се огласи со соопштение во кое изрази длабоко сочувство до семејството и апелираше да се почитува приватноста и достоинството на најблиските.

— реклама —

Од училиштето информираа дека трагичниот настан се случил на 8 јуни во просториите на училиштето, за време на училишен оброк, по што ученикот починал. Поради заштита на идентитетот на детето и неговото семејство, не се објавуваат податоци што би можеле директно или индиректно да доведат до негова идентификација.

„Училишната управа и сите вработени изразуваат длабоко сочувство до семејството на починатиот ученик и во овие тешки моменти целосно се со нив“, се наведува во соопштението.

— реклама —

Веднаш по настанот биле известени полицијата, Итната медицинска помош, Град Велика Горица и надлежните институции од Министерството за образование. Училиштето соопшти дека целосно соработува со органите кои го истражуваат случајот и ќе се воздржи од коментирање на околностите сè до завршувањето на постапките.

— реклама —

Во меѓувреме, било побарано ангажирање на Тим за кризни интервенции, кој ќе обезбеди психосоцијална поддршка за учениците и вработените погодени од трагедијата.

Според претходните информации објавени од хрватските медиуми, деветгодишникот за време на одморот се загрцнал со парче крофна. Наставничките веднаш започнале со реанимација и повикале Итна помош, која ги продолжила обидите за спасување на детето. И покрај напорите што траеле речиси 50 минути, лекарите констатирале смрт.

— реклама —

Правобранителката за деца во Хрватска повика на емпатија, воздржаност и известување без сензационализам, со цел да се заштитат семејството и децата кои биле сведоци на трагичниот настан.