Фудбалскиот клуб Тетекс соопшти трагична вест – во сообраќајна несреќа во раните утрински часови загинал 21-годишниот Даниел Николовски, поранешен фудбалер на тетовскиот клуб.
Николовски бил дел од младинските категории на Тетекс, а потоа настапувал и за сениорскиот тим. До февруари годинава бил член на тетовскиот второлигаш.
„Со голема жал и длабока болка ја споделуваме веста дека на 12.09.2026 година го загубивме нашиот Даниел“, соопштија од Тетекс.
Од клубот велат дека младиот фудбалер ќе остане запаметен како дел од нивното фудбалско семејство.
„Даниел беше дел од младинските категории на ФК Тетекс, а својата љубов кон клубот ја продолжи и како дел од сениорскиот тим. Ќе остане запаметен како дел од нашето Тетексово семејство и засекогаш ќе биде дел од историјата на нашиот клуб“, се вели во објавата.
Тетекс упати најдлабоко сочувство до семејството, најблиските и сите што го познавале Николовски.
„Почивај во мир, Даниел. Летај високо, ангелу“, напишаа од клубот.
