Пратеникот на СДСМ, Митко Трајчулески, во дебатната емисија „24 Анализа“ на ТВ 24 оцени дека укинувањето на техничката влада без консензус ја открива, како што рече, задната намера на власта, стои во соопштение на СДСМ.
Трајчулески, според соопштението на СДСМ, истакна дека суштината на техничката влада е во обезбедување доверба меѓу политичките актери и гаранции дека институциите нема да бидат злоупотребени за партиски цели, додавајќи дека ваквите решенија не треба да се носат без широк политички дијалог.
Во изјавата, како што пренесува СДСМ, Трајчулески потсети дека моделот на пржинска влада е воспоставен во 2015 година како одговор на оценките за заробена држава и злоупотреби на институциите, со цел обезбедување кредибилен изборен процес.
Тој нагласи дека изборниот законик и пржинската влада се меѓусебно поврзани и не можат да се разгледуваат одвоено, стои во соопштението на СДСМ, додавајќи дека сите измени во изборната регулатива треба да се носат со консензус меѓу политичките партии.
Трајчулески оцени дека носењето на законот по скратена постапка без дијалог претставува проблематичен пристап и дел од реформската агенда треба да се реализира преку редовна и транспарентна процедура, пренесува СДСМ.
Тој предупреди дека ваквиот начин на постапување отвора сомнежи за вистинските намери на власта и најави дека СДСМ може да се повлече од работната група доколку продолжи носењето на законот без консензус, стои во соопштението.
