Американскиот претседател Доналд Трамп соопшти дека агентите на Службата за имиграција и царина (ICE) ќе продолжат да запираат и контролираат сомнителни возила, и покрај најавената привремена ревизија на оваа практика по двата смртни случаи во кои беа вклучени агенти на службата.
„Мора да бидеме силни, цврсти и паметни и не смееме да се откажеме од едно од најважните и најефикасните средства на ICE во борбата против криминалот – запирањето и контролата на возила“, напиша Трамп на социјалните мрежи.
Изјавата доаѓа еден ден откако беше објавено дека привремено ќе се преиспитаат овие операции по два одделни инциденти. Во понеделникот агент на ICE застрела возач со потекло од Колумбија во градот Бидефорд, во американската сојузна држава Мејн, додека на 7 јули агент на службата усмрти мексикански државјанин во Хјустон, Тексас, при обид да го запре неговото возило.
Советникот на Трамп за имиграција Том Хоман изјави дека не станува збор за промена на политиката, туку за краткорочна ревизија со цел да се провери дали агентите работат согласно со процедурите и дали се обезбедени нивната безбедност и законитоста на постапките.
„Агентите ќе продолжат да користат и други методи за апсење додека трае ревизијата“, рече Хоман за „Фокс њуз“.
Инцидентите предизвикаа протести во Мејн, Хјустон и Бостон, како и нови критики поради тоа што агентите на ICE не користат камери поставени на телото.
Американското Министерство за внатрешна безбедност соопшти дека двајцата убиени биле нелегални имигранти, но призна дека ниту еден од нив не бил предмет на постапка за депортација.
Федералните власти досега не објавија докази дека убиените претставувале непосредна закана за агентите или за јавната безбедност што би ја оправдала употребата на смртоносна сила.
Според достапните податоци, од јануари 2025 година, кога Трамп ја започна кампањата за масовни депортации по враќањето во Белата куќа, најмалку седум лица загинале во операции на федералните имиграциски служби.
