Трамп: Ако сè помине според планот, утре следува историски договор со Иран

Американскиот претседател Доналд Трамп објави дека САД утре ќе потпишат нов договор со Иран, кој, според него, целосно ќе му го оневозможи на Техеран развојот на нуклеарно оружје.

Во објава на социјалната мрежа Truth Social, Трамп наведе дека веднаш по потпишувањето на договорот Хормушкиот Теснец ќе биде повторно отворен за целиот поморски сообраќај.

— реклама —

Тој остро го критикуваше нуклеарниот договор со Иран од времето на администрацијата на Барак Обама, познат како JCPOA, оценувајќи дека претставувал „лесен пат до нуклеарно оружје“.

„Мојот договор со Иран е целосна спротивност – ѕид против какво било нуклеарно оружје“, напиша Трамп.

— реклама —

Според него, Иран повеќе нема да сака ниту ќе може да поседува нуклеарно оружје, без разлика дали преку развој, купување или на друг начин.

— реклама —

Трамп истакна и дека во рамките на новиот договор нема да има финансиски трансакции меѓу двете земји, за разлика од претходниот договор, за кој тврди дека вклучувал исплати од американска страна кон Техеран.

Во објавата тој најави и идни чекори поврзани со иранскиот нуклеарен материјал, наведувајќи дека, кога ситуацијата ќе се стабилизира, САД ќе го преземат и ќе го уништат она што го нарече „нуклеарна прашина“, со помош на американските бомбардери Б-2.

— реклама —

На крајот, Трамп изрази оптимизам за идните односи со Иран и поширокиот Блиски Исток.

„Со нетрпение очекуваме да работиме со Иран и целиот Блиски Исток уште многу години“, порача американскиот претседател, додавајќи дека се надева оти процесот ќе помине „брзо, лесно и без проблеми“, но предупреди дека САД имаат и „крајна алтернатива“ доколку договорот не успее.