Американскиот претседател Доналд Трамп преку објава на социјалната мрежа „Трут соушл“ ја пофали состојбата во вооружените сили на САД, оценувајќи дека американската војска никогаш не била посилна и помоќна.
Според Трамп, ниту една друга држава не може да се спореди со воените капацитети на САД, додавајќи дека годинава биле соборени историски рекорди во регрутирањето и тоа неколку месеци пред предвидениот рок.
„Ниту една друга нација не може да го направи она што ние го правиме, ниту е блиску до тоа. Оваа година поставивме уште повеќе историски рекорди во регрутирањето, месеци пред рокот. Моралот никогаш не бил повисок. Неспоредливата моќ на нашата војска беше целосно покажана за време на прославата на 250 години од американската независност, а, како и нашата земја, Министерството за одбрана никогаш не било поангажирано. Така треба и да остане“, напиша Трамп.
Тој истовремено упати повик до Конгресот да го стави како приоритет усвојувањето на воен буџет од 350 милијарди долари, како и законот што го нарече „закон за спас на Америка“.
„Го повикувам раководството на Претставничкиот дом и Сенатот ова да го постават како свој приоритет број еден и да обезбедат 350 милијарди долари за воениот буџет. Законот за спас на Америка, за кој сите зборуваат, заедно со целосното финансирање на нашето Министерство за одбрана, може многу брзо да биде усвоен. Тоа ќе обезбеди Соединетите Американски Држави да останат слободни и за генерациите што доаѓаат“, порача Трамп.
