Американскиот претседател Доналд Трамп соопшти дека американските сили го спасиле членот на екипажот на борбениот авион F-15, кој бил тешко повреден по соборувањето над Иран.
Трамп на својот профил на Truth Social напиша дека пилотот бил пронајден „длабоко во планините на Иран“, додека иранските сили биле многу блиску. „Иранската армија го бараше интензивно, во голем број, и беше близу“, истакна тој. Дополни дека станува збор за висок офицер и дека операцијата за спасување била исклучително ризична.
„Овие акции ретко се изведуваат поради опасноста за луѓето и опремата“, посочи Трамп, нагласувајќи ја храброста на американските сили. „Тоа е неверојатен показател на храброст и способност на сите вклучени.“
Според достапните информации, станува збор за една од најризичните операции за спасување во актуелниот конфликт, при што американските сили дејствувале длабоко на територијата на Иран.
Набргу потоа, Трамп повторно упати закани кон Иран, истакнувајќи дека „вторник ќе биде Ден на електрани и Ден на мостови, сè во едно, во Иран. Не ќе биде ништо слично на тоа. Отворете го проклетиот теснец или ќе живеете во пекол – само гледајте“. Во пораката тој додаде и „слава на Алах“.
Трамп претходно се закануваше со напади на иранската енергетска инфраструктура доколку Техеран не го отвори Ормускиот теснец.
