Американскиот претседател Доналд Трамп побара пред и во Националниот музеј на американската историја во Вашингтон да бидат поставени огромни статуи на Џорџ Вашингтон, во рамки на неговите напори да влијае врз федералните културни институции.
Трамп во објава на својата социјална мрежа „Truth Social“ побара пред музејот да биде поставена „колосална статуа“ на Вашингтон, висока девет метри.
Тој исто така предложи во централниот дел на музејот, познат како „Flag Hall“, да биде поставена уште една статуа на првиот американски претседател, висока повеќе од три метри. Статуата беше изложена во август за време на трката „Freedom 250“ од серијата IndyCar, одржана во центарот на Вашингтон по повод 250-годишнината од американската независност.
Трамп побара и петгодишна изложба посветена на животот и наследството на Вашингтон, во пресрет на 300-годишнината од неговото раѓање на 22 февруари 2032 година.
„Тој е убедливо најголемиот американски херој. Без него, нашата земја и нашите слободи немаше да постојат“, напиша Трамп.
Комплексот музеи „Смитсонијан“ е во фокусот на Трамп уште од 2025 година, кога тој го обвини дека ги прикажува САД во „страшно“ светло. Во извештај од 162 страници, Белата куќа го критикуваше музејот поради, како што наведе, омаловажување на белите Американци, мажите и христијаните.
Во јули, Трамп нареди пред Националниот музеј на американската историја да бидат поставени табли со предупредувања дека музејот, според него, содржи дезинформации за американската историја.
