Трамп бесен на Зеленски: Смета дека Украина ги загрозува американските интереси

Американскиот претседател Доналд Трамп е незадоволен од украинските напади врз руските рафинерии за нафта и смета дека тие придонесуваат за раст на цените на горивата во САД, објави „Аксиос“. Според американски претставници, нападите дополнително ги влошуваат односите меѓу Трамп и украинскиот претседател Володимир Зеленски.

„Трамп е навистина лут. Смета дека Зеленски ја зема американската поддршка здраво за готово“, изјавил претставник на Белата куќа.

— реклама —

Во меѓувреме, американските претставници Стив Виткоф и Џаред Кушнер го одложиле планираното патување во Москва, додека не стане појасно дали Украина и европските земји се подготвени да усогласат заеднички предлог за рускиот претседател Владимир Путин.

Украински претставник изјавил дека на состанокот во Мајами било предупредено оти Трамп би можел да престане да споделува американски разузнавачки информации доколку Киев продолжи да ги игнорира неговите барања. Американски претставник го негирал тоа, наведувајќи дека на Украина ѝ било порачано оти САД остануваат важен партнер, но дека Киев не треба да презема дејства што им штетат на американските потрошувачи.

— реклама —

Според „Фајненшл тајмс“, САД им соопштиле на европските земји дека би можеле да ја прекинат продажбата на оружје за Украина преку НАТО доколку продолжат нападите врз руските рафинерии.

Трамп се залага за таканаречено „енергетско примирје“, кое би подразбирало прекин на нападите врз рафинериите од двете страни. Според претставник на Белата куќа, следниот чекор би можел да биде договор за запирање на нападите врз електраните и енергетските мрежи.

— реклама —

Сепак, Русија досега не прифатила ваков вид примирје, додека Украина бара прекин на нападите врз својата електроенергетска инфраструктура.

Украински претставник посочил дека Украина има една рафинерија, која повеќепати била нападната и не работи во полн капацитет, додека Русија располага со голема мрежа на рафинерии.

„Увезуваме дизел и бензин. Она што ни е потребно е Русите да престанат да ја напаѓаат нашата електроенергетска мрежа“, изјавил тој.

Иако од Белата куќа велат дека Москва ја разгледува можноста за договор, украинските медиуми објавија дека само неколку часа по најавата на Трамп, Русија повторно извршила напади врз украински електрани.