Голема истрага е во тек во американските вооружени сили по истекувањето доверливи информации за залихите на дел од најнапредното американско оружје, при што десетици високи воени лица биле подложени на полиграфско тестирање.
Американски извори запознаени со истрагата за CBS News изјавиле дека проверките биле спроведени по објавувањето во медиумите на информации за состојбата со залихите на напредната муниција. Случајот предизвикал загриженост дека доверливите податоци можеби биле пренесени и до странска разузнавачка служба.
Според еден од изворите, само мал број луѓе имале пристап до чувствителните информации за резервите на муниција, поради што истрагата се насочила кон лица кои можеле да располагаат со тие податоци.
Американскиот претседател Доналд Трамп бил особено незадоволен поради истекувањето на информациите, велат извори кои зборувале под услов на анонимност.
Полиграфските тестирања не се невообичаена практика за високи воени и цивилни функционери во САД, но бројот на лица кои летово биле подложени на ваква проверка во рамките на истрагата е исклучително голем.
Според американските власти, неколку десетици лица биле тестирани, меѓу кои и функционери од Централната команда на САД, како и други команданти на борбените команди.
Два извора наведуваат дека досега никој од тестираните не дал резултат кој би покажал дека на медиумите им откривал доверливи информации.
Претседателот на Здружениот генералштаб на американските вооружени сили, генералот Ден Кејн, не бил подложен на полиграфско тестирање, потврдил висок претставник на Пентагон.
Истрагата се спроведува само неколку недели по почетокот на војната меѓу САД и Иран. Во текот на конфликтот CBS News и други медиуми објавиле информации за забрзаното трошење на одредени напредни американски резерви на муниција, чии залихи се ограничени.
Американските власти сега се обидуваат да утврдат како овие доверливи информации стигнале до медиумите и дали нивното откривање претставува безбедносен ризик за САД.
