Американскиот претседател Доналд Трамп ги отфрли тврдењата дека израелскиот премиер Бенјамин Нетанјаху го убедил или изманипулирал да влезе во воен конфликт со Иран, нагласувајќи дека одлуката била исклучиво негова.
Во изјава дадена пред новинарите во претседателскиот авион „Ер Форс Уан“, Трамп порача дека не дозволил никој да влијае врз неговата одлука.
„Да ме измами тој мене? Јас сум тој што го започна тоа“, изјави Трамп, додавајќи дека причината за ваквиот пристап е уверувањето дека на Иран не смее да му се дозволи да поседува нуклеарно оружје.
Американскиот претседател оцени дека обвинувањата доаѓаат од неговите политички противници, кои ги нарече „глупократи“.
„Тоа се луѓе кои не знаат што прават“, рече Трамп.
Тој потсети дека неговото противење на иранската нуклеарна програма датира уште од неговиот прв претседателски мандат, кога Соединетите Американски Држави се повлекоа од нуклеарниот договор со Иран, склучен во 2015 година за време на администрацијата на поранешниот претседател Барак Обама.
Според Трамп, прашањето е особено важно за Израел, кој, како што наведе, би бил меѓу првите цели доколку Иран се стекне со нуклеарно оружје.
„Тоа е важно за Израел бидејќи веројатно ќе биде прв на удар“, изјави Трамп, додавајќи: „Ќе ви кажам нешто: да не бев јас, Израел денес немаше да постои“.
