Генералниот секретар на НАТО, Марк Руте, оцени дека американскиот претседател Доналд Трамп бил во право кога со години вршел притисок врз европските сојузници да ги зголемат трошоците за одбрана, оценувајќи дека токму тоа придонело за посилна и помодерна Алијанса.
Во интервју за „Политико“, Руте изјави дека Трамп успеал да го постигне она што, според него, американските претседатели го барале уште од времето на Двајт Ајзенхауер – порамноправна распределба на воените трошоци меѓу САД и европските членки на НАТО.
„Американскиот претседател беше во право. Ми се допаѓа тој човек. Мислам дека она што го прави за НАТО е одлична вест“, изјави Руте.
Тој најави дека претстојниот самит на НАТО ќе биде пресвртница за Алијансата, со нови инвестиции вредни милијарди долари во клучни одбранбени програми.
Според Руте, покрај американскиот притисок, дополнителен мотив за зголемување на воените буџети е и руската закана. Тој нагласи дека земјите членки остануваат посветени на воената и финансиската поддршка за Украина, како и на зајакнувањето на сопствените одбранбени капацитети.
„Мораме да ја заштитиме милијардата луѓе што живеат во земјите на НАТО од руската закана, од забрзаното кинеско вооружување и од соработката меѓу Русија, Кина, Северна Кореја и Иран“, рече Руте.
Осврнувајќи се на неодамнешната американска воена операција против Иран, генералниот секретар на НАТО истакна дека европските сојузници одиграле важна улога, овозможувајќи користење на својата инфраструктура и воени бази.
Тој посочи дека Романија привремено го затворила својот најголем цивилен аеродром за потребите на американската авијација, додавајќи дека илјадници американски летови биле реализирани од европски аеродроми.
Руте заклучи дека, и покрај повремените несогласувања, НАТО останува единствен со САД како клучен партнер.
„Трамп има право кога вели дека постојат поединечни случаи што го разочаруваат, но ако се погледне целокупната слика, европските сојузници направија огромен исчекор“, изјави Руте.
