Американскиот претседател Доналд Трамп соопшти дека Европа се согласила веднаш да ослободи големи количества дизел од своите резерви, во услови на нагло зголемување на цените на горивото.
Трамп информацијата ја објави на социјалните мрежи, но не прецизираше кои европски земји ќе ги ослободат резервите ниту за кои количества станува збор.
„Европа штотуку се согласи да ослободи огромна количина од своите големи резерви на дизел гориво. Процесот ќе започне веднаш“, напиша Трамп.
Францускиот претседател Емануел Макрон потврди дека земјите од Г7 ќе ослободат до 100 милиони барели нафтени резерви, меѓу кои и дизел. Според него, резервите ќе се распределуваат во период од четири месеци под координација на Меѓународната агенција за енергија.
Земјите од Г7 се договориле и нивните рафинерии да работат со „максимален капацитет“, додека нема да преземаат мерки со кои би се ограничила меѓусебната размена на енергија и нафтени деривати.
Во заедничкото соопштение на Г7 се наведува дека во рамките на вкупното ослободување од 100 милиони барели, на почетокот ќе биде ослободена значителна количина дизел. Членките во првите 20 дена ќе пуштат дел од резервите, а потоа ќе разговараат со Меѓународната агенција за енергија за можноста за дополнително ослободување доколку биде потребно.
Договорот доаѓа во период на раст на цените на горивото во САД и други земји. Просечната цена на галон дизел во САД достигнала 6,37 долари, откако на 22 септември била забележана рекордна цена од 6,52 долари.
Трамп претходно разговарал со Макрон, кој моментално претседава со Г7, за растот на цените на горивото и достапноста на нафтените деривати. По разговорот, Макрон претседавал со видеоконференција на лидерите на Г7 посветена на ова прашање.
Информациите следуваат откако земјите од Европската Унија разговарале за францускиот предлог европските земји да ослободат 50 милиони барели дизел од стратешките резерви, додека членките на Меѓународната агенција за енергија би ослободиле дополнителни 50 милиони барели сурова нафта.
Во меѓувреме, истражување на AP-NORC покажало дека мнозинството возрасни Американци го сметаат Трамп за одговорен за високите цени, додека поддршката за неговото водење на економијата паднала на најниско ниво.
Трамп, од своја страна, оваа недела сам на својата економска политика ѝ даде оценка „А+“, но истакна дека администрацијата, според него, има проблем со начинот на кој ги претставува своите резултати во јавноста.
