Трамп го брани договорот со Путин: „Донесов правилна одлука за Американците“

Американскиот претседател Доналд Трамп го брани договорот со рускиот претседател Владимир Путин за увоз на руски дизел во САД, и покрај острите критики од Европа, Украина и дел од американскиот Конгрес.

Во објава на својата социјална мрежа „Трут соушал“, Трамп порача дека одлуката е оправдана поради потребите на американскиот пазар, притоа посочувајќи дека и европските земји купуваат руски енергенси.

— реклама —

„Донесов правилна одлука за американскиот народ“, напиша Трамп, откако во изминатите денови се зголемија реакциите против договорот со Москва.

Европските претставници предупредуваат дека дополнителните приходи од рускиот извоз на енергенси би можеле да ѝ помогнат на Москва да ја финансира војната во Украина. И Киев остро се спротивстави на договорот.

— реклама —

Трамп на 9 октомври објави дека со Путин договорил испорака на руски дизел за американскиот и светскиот пазар. Според неговата најава, Русија треба веднаш да испорача повеќе од 300.000 тони, дополнителни 500.000 тони во текот на ноември, а потоа уште еден милион тони.

Тој најави и можност за дополнителни испораки од неколку милиони тони, во зависност од состојбата на руските рафинерии. По ова, Вашингтон привремено ги ублажи ограничувањата за увоз на руски дизел до април 2027 година.

Европската Унија соопшти дека ќе продолжи со притисокот врз Русија и со санкциите. Високата претставничка на ЕУ за надворешна политика, Каја Калас, оцени дека за завршување на војната е потребен посилен притисок врз Москва, а не отворање нови извори на приходи.

— реклама —

Договорот го критикуваше и канадскиот премиер Марк Карни, кој порача дека тој е во директна спротивност со напорите на Украина, Канада и нивните сојузници за постигнување мир и стабилност во Европа.

Украинскиот претседател Володимир Зеленски претходно изјави дека договорот со Путин не е „чесен ниту искрен“ и предупреди дека приходите од рускиот извоз на енергенси ѝ овозможуваат на Москва да ја продолжи војната.

Против договорот се изјаснија и некои републикански сенатори во САД. Том Тилис предупреди дека потегот би можел да биде во спротивност со американскиот закон, додека група сенатори од двете партии побараа од администрацијата на Трамп веднаш да се откаже од планот.

Аналитичарите, пак, го доведоа во прашање и економскиот ефект од договорот. Почетната количина од 300.000 тони руски дизел е релативно мала во споредба со американската потрошувачка, поради што не се очекува таа сама по себе значително да ги намали цените на горивата.