Американскиот претседател Доналд Трамп остро го критикува израелскиот претседател Исак Херцог, нарекувајќи го „слаб и патетичен“ и обвинувајќи го дека го лажел дека ќе го помилува премиерот Бенјамин Нетанјаху.
Трамп тврди дека Херцог повеќепати му ветил помилување, додека израелската страна ги негира овие тврдења.
„Повеќе пати, не само еднаш, ми кажа дека ќе го помилува, а лажеше“, изјави Трамп, додавајќи дека Херцог „не е лидер“.
Американскиот претседател смета дека судењето за корупција против Нетанјаху го одвраќа вниманието од воените напори.
„Биби треба да се фокусира на војната, а не на глупости“, порача Трамп.
Еден висок израелски функционер ги одби тврдењата на Трамп, наведувајќи дека Херцог никогаш не дал такво ветување, туку само рекол дека ќе го разгледа барањето за помилување во согласност со законот.
Бенјамин Нетанјаху се соочува со долгорочни обвиненија за корупција, вклучувајќи примање услуги и погодности во замена за регулаторни олеснувања, законодавни потези и политичка поддршка од богати бизнисмени и медиумски магнати.
Во однос на војната со Иран, Трамп одби да прецизира дали американските сили ќе таргетираат или окупираат иранска нафтена и гасна инфраструктура, наведувајќи дека во овој момент не може да даде одговор.
