Американскиот претседател Доналд Трамп на својата платформа „Трут Соушл“ објави карта на која Ормускиот Теснец е означен како „Проток Трамп“. Објавата следува откако Иран понуди повторно отворање на стратешкиот воден коридор во рок од една недела, под услов САД да исполнат неколку барања, јави „Асошиејтед прес“.
Објавата на Трамп е прв јавно забележлив сигнал за неговата позиција откако Техеран го претстави новиот предлог. Иранската страна најави дека е подготвена за повторно отворање на Ормускиот Теснец и продолжување на разговорите доколку бидат исполнети условите што ги постави.
Белата куќа вчера соопшти дека американски претставници водат позитивни и конструктивни разговори со посредници поврзани со војната со Иран. Претходно оваа недела двете страни одржаа повеќечасовни индиректни разговори преку посредници.
Во меѓувреме, иранските медиуми објавија дека претседателот Масуд Пезешкијан заминал од Њујорк кон Техеран по годишното заседание на светските лидери во рамките на Генералното собрание на ООН. Во своето обраќање тој ја отфрли најновата закана на Трамп дека ќе ја „уништи“ Исламската Република, но нагласи дека Техеран останува отворен за дипломатија.
Иранскиот министер за надворешни работи Абас Арагчи синоќа изјави дека според предлогот на Техеран, Иран би го отворил Ормускиот Теснец и би ги продолжил преговорите за својата нуклеарна програма во рок од седум дена. Како услови ги наведе укинувањето на американската морска блокада на иранските пристаништа, отстранувањето на санкциите врз продажбата на иранска нафта и почитувањето на примирјето што би го опфатило и Либан.
Подоцна, „Волстрит журнал“, повикувајќи се на високи американски претставници, објави дека Трамп ја одбил иранската понуда за отворање на Ормускиот Теснец и прекин на борбите во регионот во рок од една недела. Според весникот, Трамп пред своите соработници рекол дека очекува да ги обнови бомбардирањата по изборите за Конгресот во ноември.
