Американскиот претседател Доналд Трамп денеска се сретна во Белата куќа со израелскиот премиер Бенјамин Нетанјаху, веднаш по завршувањето на разговорот со украинскиот претседател Володимир Зеленски.
Како што пренесува NBC, ова е прва средба во живо меѓу американскиот претседател и израелскиот премиер по последната ескалација на тензиите меѓу Израел и Иран. Се очекува главни теми на разговорите да бидат безбедносната состојба на Блискиот Исток, американско-израелската соработка и понатамошните дипломатски напори во регионот.
Трамп во изминатите денови изјави дека меѓу него и Нетанјаху постојат одредени несогласувања во врска со воените операции, но оцени дека нивните ставови и понатаму се „многу блиски“.
Во исто време, тој истакна дека со израелскиот премиер има „одличен однос“.
„Аксиос“ во јуни објави дека за време на телефонски разговор меѓу двајцата лидери дошло до тензии поради израелската ескалација на судирот во Либан, за која Вашингтон сметал дека може да ги загрози преговорите меѓу САД и Иран.
Неколку дена подоцна, Трамп во интервју за „Њујорк пост“ потврди дека разговарал со Нетанјаху за израелските напади во Либан, наведувајќи дека не бил лут, туку „малку вознемирен“ поради продолжувањето на борбите.
„Не би рекол дека бев лут. Бев малку вознемирен поради неговите постојани судири со Либан. Во еден момент му реков: ‘Биби, мораме да го запреме ова, мораме да го запреме.’ Но, имаме многу добар однос“, изјави Трамп.
Говорејќи за политичката иднина на Нетанјаху, Трамп одби да каже дали го поддржува неговиот повторен избор, но оцени дека израелскиот премиер бил „одличен воен лидер“ и додаде дека верува оти поради тоа треба да ужива значителна поддршка од јавноста.
