Трамп и Путин разговарале за договор што би ја преобликувал безбедноста на цела Европа

Американскиот претседател Доналд Трамп откри дека разговарал со рускиот претседател Владимир Путин за договор за завршување на војната во Украина, но и за пошироко преуредување на безбедносната архитектура во Европа.

Трамп оцени дека е можно наскоро да биде постигнат „голем, убав договор“, уште пред новата рунда мировни преговори што следната недела треба да се одржат во Заливот. Неговиот зет и висок претставник Џаред Кушнер дополнително најави разговори за создавање постабилна и попредвидлива безбедносна средина за цела Европа.

Според британскиот „Телеграф“, ваквите најави би можеле да ги засилат стравувањата од голем договор меѓу САД и Русија, каков што Москва долго посакува, додека се обидува да го обнови своето влијание.

— реклама —

Контактите меѓу Вашингтон и Москва се интензивирале во изминатите недели. Во четвртокот, Белата куќа го прими Кирил Дмитриев, висок соработник на Путин, кој на првата дама на САД, Меланија Трамп, ѝ подарил слика од 11-годишно девојче евакуирано од линијата на фронтот, со порака: „Ја сакам Меланија“.

Подоцна, Трамп изјави дека се сретнал со „главниот човек на Русија“, но не откри детали од разговорот со Путин.

„Не можам да ви кажам за што разговаравме, но ќе ви кажам дека ќе биде постигнат договор. Ќе биде голем договор и ќе опфаќа повеќе од Украина. Може да ја опфати цела Европа“, рече американскиот претседател.

— реклама —

Кушнер, во објава на социјалната мрежа Икс, наведе дека Трамп разговарал со неколку европски лидери за потребата од поширока безбедносна архитектура. Според него, целта е да се воспостават практични механизми што ќе ги опфатат безбедносните грижи на сите страни, ќе го намалат ризикот од идни судири и ќе создадат постабилни услови.

Разговорите, како што посочи Кушнер, се насочени кон пет главни области: редовни безбедносни консултации, сигурна комуникација во кризни ситуации, поголема воена транспарентност, заемни мерки за намалување на ризикот од ескалација и долгорочна рамка за европска безбедност и стабилност.

— реклама —

Тој нагласи дека секој договор мора целосно да ги почитува суверенитетот, територијалниот интегритет и самостојното донесување одлуки на секоја држава, додавајќи дека НАТО ќе остане централен дел од колективната одбрана на Европа.

Следната недела разговорите треба да продолжат во Абу Даби, каде што украински и руски преговарачи ќе ги разгледуваат предлозите со САД. Се очекува присуство на претставници на Европската Унија, НАТО, Велика Британија, Франција и Германија, иако не е извесно дека тие непосредно ќе учествуваат во преговорите.

Европските лидери, според „Телеграф“, сè уште се обидуваат да најдат заеднички претставник за разговорите. Италијанската премиерка Џорџа Мелони го критикувала директниот пристап на ЕУ кон мировните преговори, предупредувајќи дека Унијата ризикува да стане неважна во процесот.

— реклама —

Дополнителна загриженост во Европа предизвикува и најавата дека Трамп подоцна овој месец би можел да одржи заеднички разговори со Путин и кинескиот претседател Си Џинпинг, на маргините на самитот на АПЕК во Шенжен. Подготовките за средбата веќе се во тек, потврди Пекинг.

Можната средба е споредена со конференцијата во Јалта од 1945 година, на која лидерите на Велика Британија, САД и Советскиот Сојуз разговарале за иднината на повоена Европа. Европски претставници изјавиле за „Телеграф“ дека ќе се спротивстават на евентуалните обиди на САД да постигнат договор за Украина без учество на Киев и неговите сојузници.