Американскиот претседател Доналд Трамп изјави дека имал „многу добра средба“ со украинскиот претседател Володимир Зеленски на Самитот на Г7 во францускиот Евијан и најави дека двајцата повторно ќе разговараат подоцна во текот на денот.
„Русија треба да склучи договор. Русија изгуби огромен број луѓе, а истото е и со Украина. Ќе направам сè што можам“, изјави Трамп пред новинарите, додавајќи дека во неделата разговарал и со рускиот претседател Владимир Путин.
Тој призна дека постои „голема антипатија“ меѓу Путин и Зеленски, што дополнително ги отежнува мировните напори.
Во меѓувреме, Зеленски се обидува повторно да го насочи вниманието на американската администрација кон војната во Украина, особено откако Вашингтон и Техеран постигнаа привремен договор за прекин на огнот.
Украинскиот претседател порача дека му е потребен поголем американски притисок врз Русија и оцени дека „Трамп може да го направи тоа, или можеби само тој“.
Зеленски изјави и дека Трамп бил „многу позитивен“ во однос на можноста за дополнителна поддршка со ракетите „Патриот“, додека Киев продолжува да бара дозвола за нивно локално производство.
Британскиот премиер Кир Стармер, пак, оцени дека лидерите на Г7 покажале единство околу Украина и дека сега е моментот дополнително да се зголеми притисокот врз Москва.
