Трамп: „Извлекуваме милиони и милиони барели нафта од Венецуела“

Американскиот претседател Доналд Трамп изјави дека САД од Венецуела преземаат милиони барели нафта, опишувајќи ги односите меѓу Вашингтон и Каракас како „извонредни“.

„Извлекуваме милиони и милиони барели нафта. Кога велат: „На победникот му припаѓа пленот“, ова е еден од најголемите такви примери што некој некогаш ги видел во историјата“, изјави Трамп за време на посетата на Северна Каролина.

— реклама —

Тој нагласи дека американски нафтени компании работат во Венецуела и дека Вашингтон тесно соработува со тамошната влада. Сепак, Трамп не прецизираше за какви количини на нафта станува збор.

Изјавите доаѓаат откако американската администрација претходно овој месец објави голем договор поврзан со нафтените ресурси на Венецуела. Според Белата куќа, со договорот на САД им се обезбедува мнозинска контрола врз повеќе од 65 милијарди барели докажани резерви, како и пристап до производството на 17 нафтени полиња.

— реклама —

Во договорот е вклучена приватната нафтена компанија „North American Blue Energy Partners“, а не директно привремената влада на Венецуела.

— реклама —

Американската администрација најави дека милиони барели нова венецуелска нафта ќе се преработуваат во рафинерии во САД, додека производството се очекува да расте паралелно со проширувањето на активностите на американските компании во Венецуела.

Нафтата стана еден од клучните елементи во односите меѓу Вашингтон и Каракас по смената на претседателот Николас Мадуро. САД соопштија и дека трошоците за нивната воена операција во Венецуела биле покриени со приходите од нафтените ресурси на земјата.

Венецуела ги има најголемите докажани резерви на сурова нафта во светот, но нејзината нафтена индустрија со години бележи пад поради намаленото производство, недостигот од инвестиции и санкциите.

Белата куќа тврди дека новиот договор треба да придонесе за зголемување на производството, привлекување инвестиции и економско закрепнување на Венецуела, како дел од поширокиот план за стабилизација, обнова и политичка транзиција на земјата.