Европа еден ден ќе му биде благодарна на американскиот претседател Доналд Трамп затоа што ја принудил да ја зајакне сопствената одбрана и да ја намали зависноста од САД, изјави британскиот министер за одбрана Вес Стритинг.
Во интервју за „Скај њуз“, Стритинг оцени дека Трамп ја разбудил Европа во поглед на издвојувањата за одбраната.
„Кога ќе се пишува историјата, Европа ќе му биде благодарна на претседателот Трамп што нè разбуди од удобноста во која бевме кога станува збор за инвестициите во одбраната“, рече Стритинг.
Тој нагласи дека не секогаш се согласува со изјавите и методите на Трамп, но додаде дека американското незадоволство од недоволните европски вложувања во одбраната не е ново и не е ограничено само на администрацијата на Трамп.
„Тоа не е став само на Трамп, движењето МАГА или Републиканската партија. Незадоволството на САД од Европа по ова прашање постои со децении, без разлика дали на власт се демократи или републиканци“, истакна британскиот министер.
Стритинг рече дека има доверба во Соединетите Американски Држави и ја нагласи важноста на безбедносното партнерство меѓу Лондон и Вашингтон.
Осврнувајќи се на разговорот со американскиот министер за одбрана Пит Хегсет, тој повтори дека Велика Британија не ги поддржува офанзивните воени операции против Иран, но оцени дека двете земји можат тесно да соработуваат во обезбедувањето на Ормускиот теснец.
