Американскиот претседател Доналд Трамп ѝ нареди на американската морнарица да го напушти современиот електромагнетен систем за лансирање авиони и повторно да користи парни катапулти на идните носачи на авиони од класата „Џералд Р. Форд“. Наредбата се однесува почнувајќи од идниот носач USS „Дорис Милер“.
Со меморандумот, потпишан во четвртокот, Пентагон и Морнарицата добиле рок од 60 дена да подготват план за замена на системот EMALS, како и на напредните електромагнетни лифтови за оружје со парни и хидраулични системи.
Одлуката може да предизвика огромни дополнителни трошоци, бидејќи „Дорис Милер“ е веќе во фаза на изградба, а работата на електромагнетниот систем е речиси половина завршена. Производителот „Џенерал Атомикс“ предупреди дека промената во оваа фаза би донела сериозни трошоци, доцнења и ризици при интеграцијата.
Трамп со години го критикува EMALS и јавно го фаворизира постариот систем на пареа. Сепак, електромагнетниот систем е развиен токму за да овозможи поголема ефикасност, помал број членови на екипажот и полесно одржување.
Промената засега нема да ги опфати веќе изградените „USS Gerald R. Ford“, како ни „USS John F. Kennedy“ и „USS Enterprise“, кои треба да го задржат EMALS.
Одлуката доаѓа во момент кога американската морнарица се соочува со недостиг на кадар, а враќањето на парните катапулти би барало повеќе персонал и посложено одржување. Во меѓувреме, Кина и Франција исто така се определуваат за електромагнетната технологија на своите нови носачи на авиони.
