Американскиот претседател Доналд Трамп најави дека ќе ја пријави водителката на Ен-Би-Си, Кристен Велкер, до Федералната комисија за комуникации (ФЦЦ), откако таа оцени дека кандидатите што ги поддржал оствариле мешани резултати.
Трамп на својата социјална мрежа „Truth Social“ ја обвини Велкер за „намерна неточност“ и најави дека ќе побара од ФЦЦ да ѝ изрече опомена или казна. Притоа тој не наведе конкретна анкета на која се однесуваат неговите обвинувања за наводно лажни истражувања.
Американскиот претседател тврди дека сите кандидати за Сенатот што ги поддржал победиле на републиканските внатрепартиски избори, додека успешноста кај кандидатите за Претставничкиот дом, според него, била 98 отсто.
Трамп ја нападна Велкер и нејзината емисија „Meet the Press“, која саркастично ја нарече „Meet the Fake Press“, обвинувајќи ги медиумите дека се обидуваат да ги омаловажат неговите политички успеси.
Сепак, податоците на „Ballotpedia“ покажуваат дека околу 96 отсто од кандидатите поддржани од Трамп победиле на републиканските внатрепартиски избори. Анализа на „Њујорк тајмс“ покажува дека речиси 40 отсто од неговите кандидати се натпреварувале без противкандидат, додека значителен дел од останатите биле актуелни носители на функции.
Според достапните информации, ФЦЦ нема директна надлежност да ја казни Велкер како поединечна новинарка. Комисијата ги регулира локалните телевизиски станици што користат јавен фреквенциски спектар, но не издава дозволи на телевизиски мрежи или на нивни новинари.
Ен-Би-Си засега не го коментирал барањето на Трамп.
