Американскиот претседател Доналд Трамп упати низа пофалби за турскиот претседател Реџеп Таип Ердоган по завршувањето на самитот на НАТО во Турција, нарекувајќи го свој долгогодишен пријател и извонреден лидер.
„Само што завршивме многу успешен самит на НАТО тука во Турција и сакам да му се заблагодарам на претседателот Ердоган. Тој е навистина одличен човек, одличен лидер и мој пријател веќе долго време. Тој е силна личност и затоа води толку успешна земја. Од воен аспект, Турција е многу моќна“, изјави Трамп.
Тој го пофали и генералниот секретар на НАТО, Марк Руте, за кого рече дека е „паметен и извонреден лидер“.
„Не е лесно да се водат толку многу лидери со силни личности. Марк врши неверојатна работа. Немаше да можам да најдам подобар човек за таа функција“, рече Трамп.
Американскиот претседател додаде дека атмосферата на самитот била исклучително позитивна.
„Во таа просторија имаше огромна љубов. И медиумите можеа да го видат тоа“, истакна тој.
Осврнувајќи се на Блискиот Исток, Трамп рече дека цената на нафтата паднала и изрази надеж дека ќе остане ниска.
Тој додаде дека САД презеле чекори кои, според него, требало да бидат направени уште пред 47 години во односите со Иран, а истовремено ја пофали американската воена моќ, тврдејќи дека располага со опрема каква што нема ниту една друга држава во светот.
