Трамп најави помилувања за своите соработници, подготвен да го заштити и Илон Маск

Американскиот претседател Доналд Трамп изјави дека е подготвен однапред да ги помилува своите соработници доколку демократите по конгресните избори ја преземат контролата врз Конгресот и покренат постапки против членови на неговата администрација. Тој најави дека би го заштитил и милијардерот Илон Маск доколку се најде на мета на истраги.

Трамп ова го изјавил во интервју за подкастот „Под форс уан“, во разговор со новинарката Миранда Дивајн, објавен ден пред американските меѓуизбори.

На прашањето дали би ги помилувал луѓето што работеле во неговата администрација доколку им се закани кривичен прогон, Трамп одговорил потврдно.

— реклама —

„Би го направил тоа ако е потребно. Секако“, изјавил тој, додавајќи дека не би се двоумел да обезбеди таква заштита за сите свои соработници.

Тој потсетил и дека по враќањето во Белата куќа помилувал околу 1.500 лица поврзани со нападот врз американскиот Капитол на 6 јануари 2021 година.

— реклама —

Посебно внимание посветил на Илон Маск, сопственикот на „Тесла“ и „СпејсИкс“, кој во вториот претседателски мандат на Трамп учествуваше во работата на администрацијата и ја предводеше иницијативата за намалување на државните трошоци, позната како ДОЏ.

На прашањето дали демократите би можеле да поведат истраги против Маск или да се обидат да го преземат неговиот имот, Трамп одговорил дека засега станува збор само за најави.

„Тоа се само приказни. Но, ако дојде до тоа, ќе мора да го заштитиме“, порачал американскиот претседател.

— реклама —

Трамп ја отфрлил и можноста за национализација на „СпејсИкс“, за која зборувале некои демократски политичари. Во разговорот го споменал и Едвард Користин, млад соработник кој работел во проектот ДОЏ на Маск.

Изјавите доаѓаат во пресрет на изборите на 3 ноември, на кои демократите се обидуваат да освојат контрола врз најмалку еден дом на Конгресот. Во таков случај би можеле да поведуваат парламентарни истраги, да повикуваат функционери на сослушувања и да бараат документи од администрацијата.

— реклама —

Демократскиот пратеник Џејми Раскин веќе најавил истраги за можна корупција во администрацијата, додека сенаторката Елиса Слоткин говорела за потребата од одговорност на лицата кои овозможиле можни незаконски постапки.

Трамп можноста за помилувања ја оправдал повикувајќи се и на постапките на неговиот претходник Џо Бајден, кој пред истекот на мандатот превентивно помилувал членови на своето семејство и повеќе лица за кои стравувал дека би можеле да станат мета на политички мотивиран прогон.

Сепак, претседателските помилувања се однесуваат на федерални кривични дела и не можат да ги спречат конгресните истраги, граѓанските тужби или кривичните постапки според законите на одделни сојузни држави. Трамп засега не објавил конкретен план ниту список на лица што би ги опфатил со евентуалните помилувања.