Трамп најавува можен договор со Иран, Оман предлага нов модел за Ормускиот теснец

Оман доби поддршка од земјите од Персискиот Залив за предлогот Иран да наплатува доброволни надоместоци за пловидба низ Ормускиот Теснец, со цел да се нормализира транспортот на нафта нарушен по конфликтот меѓу САД, Израел и Иран.

— реклама —

Предлогот предвидува Иран да не ја има единствената контрола врз теснецот, а надоместоците да бидат доброволни, по примерот на Малаканскиот Теснец во Азија, каде средствата се користат за безбедност на пловидбата, заштита на животната средина и спасувачки операции.

Американскиот претседател Доналд Трамп изјави дека Вашингтон води „добри разговори“ со Техеран, но предупреди дека американските напади ќе продолжат доколку преговорите пропаднат. Од друга страна, Иран тврди дека не побарал обновување на преговорите со САД.

— реклама —

Ормускиот теснец, низ кој пред почетокот на конфликтот минуваше околу една петтина од светската трговија со нафта и течен природен гас, беше сериозно погоден од воените случувања. По американско-израелските напади, Иран го ограничи поморскиот сообраќај, а подоцнежниот договор за делумно отворање на пловниот пат пропадна на почетокот на јули.

— реклама —

Во понеделникот, иранскиот министер за надворешни работи Абас Арагчи разговараше со своите колеги од Оман и Саудиска Арабија за ситуацијата во Ормускиот Теснец, при што беше нагласена потребата од регионална соработка.

Во меѓувреме, прекинот на американските воздушни напади придонесе за пад на цените на нафтата. Цената на суровата нафта „брент“ се намали за повеќе од 2,5 проценти и се движи околу 86 долари за барел.

Вашингтон и Техеран треба да ги продолжат преговорите до крајот на август, но и натаму постојат несогласувања околу тоа дали меморандумот гарантира слободна пловидба или му дава на Иран право да го контролира транзитот низ Ормускиот теснец.