Американскиот претседател Доналд Трамп се закани дека САД следната недела ќе ги прошират нападите врз Иран и ќе ја таргетираат критичната инфраструктура доколку Техеран не се согласи на преговори.
Во интервју за „Фокс њуз“, Трамп изјави дека на удар ќе бидат електраните и мостовите.
„Следната недела работите навистина ќе станат лоши за нив. Следната недела доаѓаат електраните. Следната недела доаѓаат мостовите. Ќе ги уништиме сите нивни електрани и мостови, освен ако не седнат на маса и не преговараат“, рече Трамп.
Неговите изјави доаѓаат во време кога американските сили четврти ден по ред изведуваат напади врз Иран и повторно воведоа поморска блокада на иранските пристаништа во Ормускиот Теснец. Од американската Централна команда соопштија дека нападите се насочени кон намалување на иранските капацитети што се користат за напади врз комерцијалниот поморски сообраќај.
Иранските државни медиуми објавија експлозии во близина на пристанишниот град Бандар Абас, додека Иранската револуционерна гарда соопшти дека извршила напади врз американски воени цели во Бахреин. Напади беа пријавени и во Кувајт, а Јордан соопшти дека неговата противвоздушна одбрана пресретнала три балистички ракети.
Во меѓувреме, Иран предупреди дека доколку САД се обидат да го блокираат извозот на нафта и гас од регионот, може да бидат затворени и други клучни енергетски рути, дополнително зголемувајќи ја опасноста од поширока ескалација на конфликтот на Блискиот Исток.
