Доналд Трамп ги отфрли предупредувањата за катастрофалните ризици од вештачката интелигенција, оценувајќи дека неговата главна грижа е САД да не ја загубат предноста во технолошката трка со Кина.
На прашањето дали го загрижува егзистенцијалната закана што може да ја претставува вештачката интелигенција, американскиот претседател во четвртокот вечерта одговори: „Не, воопшто не ме загрижува“.
Трамп, сепак, нагласи дека е загрижен за можноста САД да заостанат во развојот на оваа технологија.
„Ме загрижува дека ќе бидеме во лоша положба ако не победиме во развојот на вештачката интелигенција. Во моментов имаме значителна предност пред Кина“, изјави тој пред новинарите во Далас.
Неговите изјави уследија по новите предупредувања од истражувачи за можните опасности од напредната вештачка интелигенција. Дебатата ја засили и објавата на поранешен истражувач на „Антропик“ и „Опенаи“, кој предупреди дека водечките технолошки компании преземаат огромни ризици и дека дел од експертите стравуваат оти технологијата би можела да има катастрофални последици уште до крајот на деценијата.
Дополнителна загриженост предизвикаа и неодамнешни случаи во кои системи со вештачка интелигенција самостојно започнувале хакерски напади. Сето тоа поттикна нови повици од американски пратеници, од двете најголеми партии, за построга регулација на брзорастечката технологија.
Ставот на Трамп се разликува од ставот на дел од републиканските функционери. Сенаторот Тед Круз од Тексас, кој претседава со Комитетот за трговија, изјави дека ризиците од вештачката интелигенција се „длабоко загрижувачки“, но истовремено оцени дека САД не смеат да ѝ дозволат на Кина да ја преземе предноста.
Круз најави дека неговиот комитет овој месец би можел да разгледува законски предлози поврзани со вештачката интелигенција. Еден од нив се однесува на можноста технологијата да биде искористена за создавање биолошки и нуклеарни закани.
Во меѓувреме, пратеничката Ана Паулина Луна повика Конгресот да одржи вонредна седница за последиците од развојот на оваа технологија.
Трамп силно ја поддржува американската индустрија за вештачка интелигенција, која ја гледа како двигател на економскиот раст и зголемувањето на вредноста на акциите. Тој се спротивставува и на барањата од дел од републиканските функционери и гласачи да се забави изградбата на центри за податоци поради нивната огромна потрошувачка на електрична енергија и зафаќањето земјиште.
Минатиот месец Трамп порача дека отпорот кон изградбата на центри за податоци може да ги остави американските заедници зад Кина. Според него, ограничувањето на нивната изградба би можело да ѝ оди во прилог на Пекинг.
