Американскиот претседател Доналд Трамп изјави дека нема ништо против кинески компании да отворат фабрики и да произведуваат автомобили во САД, под услов производството да биде на американска територија и да вработува американски работници.
Ставот доаѓа во време на силен притисок од дел од американските законодавци и автомобилската индустрија трајно да се ограничи пристапот на кинеските производители до американскиот пазар.
„Ако Кина сака да дојде и да отвори фабрика за тука да ги произведува своите автомобили, тоа би било во ред за мене. Јапонија го прави тоа, но ги вработува нашите луѓе. Важно е да ги вработуваат нашите луѓе“, изјави Трамп во интервју за „Фокс њуз“.
Тој, сепак, направи јасна разлика меѓу производство во САД и увоз. Според Трамп, не сака кинеските компании да произведуваат автомобили во Мексико, а потоа да ги извезуваат на американскиот пазар.
Изјавата доаѓа пред најавената средба на Трамп со кинескиот претседател Си Џинпинг за околу две недели, во период кога американските автомобилски производители бараат Вашингтон да не ѝ овозможи на кинеската автоиндустрија поширок пристап до пазарот.
Дополнителна полемика отвори демократската сенаторка Елиса Слоткин, која рече дека постојат „гласини“ оти Трамп планира да дозволи продажба на кинески автомобили во САД како дел од поширок договор што се подготвува. Таа таквиот потег го оцени како „стратешка грешка“.
Трамп ги отфрли нејзините тврдења како „целосно лажна гласина“ и рече дека токму тој го блокирал влезот на кинеските возила во САД.
Во моментов американскиот пазар е силно затворен за кинеската автомобилска индустрија. Пропис воведен од администрацијата на поранешниот претседател Џо Бајден на почетокот од 2025 година им забранува на кинеските производители да продаваат или произведуваат патнички возила во САД, а Вашингтон задржува и царини повисоки од 100 отсто за кинеските електрични автомобили.
Притисокот за дополнително заострување продолжува. „Alliance for Automotive Innovation“, организација која ги претставува речиси сите големи производители на американскиот пазар, побара од Конгресот до крајот на декември да усвои закон со кој трајно би се забранил пристапот на кинеските возила.
Организацијата ги претставува „Џенерал моторс“, „Форд“, „Тојота“, „Фолксваген“, „Хјундаи“, „Хонда“, „Стелантис“ и други производители.
Нејзиниот претседател Џон Бозела тврди дека кинеските производители во светот пласираат субвенционирани возила со поврзан хардвер и софтвер по цени со кои другите производители тешко можат да се натпреваруваат.
Изјавата на Трамп, сепак, покажува дека тој не ја исклучува кинеската автомобилска индустрија целосно – неговиот услов е производството и работните места да бидат во САД, наместо автомобилите да се произведуваат во трети земји и потоа да се увезуваат на американскиот пазар.
