Американскиот претседател Доналд Трамп испрати серија пораки на својата социјална мрежа Truth Social, во кои порача дека најновите американски напади врз Иран се директен одговор на нападите врз трговски бродови во Ормускиот теснец.
„Ова е одмазда за вчерашното иранско бомбардирање на бродови. Ако тоа се повтори, ќе биде многу полошо“, напиша Трамп.
Во меѓувреме, американската војска потврди дека започнала нов бран напади врз ирански цели, со образложение дека операцијата има цел да ја намали способноста на Техеран да го загрозува поморскиот сообраќај низ Ормускиот теснец.
Од Централната команда на САД (ЦЕНТКОМ) соопштија дека Вашингтон го смета Иран за одговорен за неодамнешните напади врз трговски бродови и нивните цивилни екипажи.
Трамп претходно изјави дека привремениот договор со Иран повеќе не постои.
„За мене, договорот е завршена приказна. Не сакам повеќе да имам никаква работа со нив“, рече американскиот претседател, додавајќи дека не е сигурен оти Техеран би ги почитувал обврските дури и ако биде постигнат нов договор.
Иранските државни медиуми објавија дека по американските напади се слушнале експлозии во повеќе градови на југот на земјата, меѓу кои Бандар Абас, Конарак и Чабахар.
Покрај кризата со Иран, Трамп се осврна и на внатрешни политички теми, најавувајќи дека повторно ќе побара Врховниот суд на САД да ја разгледа можноста за ограничување на автоматското стекнување американско државјанство по раѓање.
Сепак, најголемо внимание предизвикаа неговите пораки поврзани со Иран, во кои јасно порача дека доколку има нови напади врз бродови, американскиот одговор ќе биде уште посилен.
