Претседателот на Соединетите Американски Држави, Доналд Трамп, изјави дека одбива да носи панцир и покрај повеќекратните обиди за атентат, иако призна дека таква препорака му била дадена од безбедносните служби.
Во разговор со новинари, Трамп на шега посочи дека не би сакал да изгледа „уште 20 килограми потежок“, коментирајќи го предлогот за носење заштитен елек. Сепак, додаде дека станува збор за прашање за кое можеби ќе размисли.
Тој се осврна и на неодамнешниот инцидент во кој агент на Тајната служба бил ранет за време на последниот обид за напад врз него, истакнувајќи дека токму панцирот му го спасил животот. Според Трамп, агентот бил погоден одблизу, но сепак не сакал ни да биде пренесен во болница.
На прашањето дали стравува од нови обиди за атентат, Трамп одговори дека не размислува за тоа, додавајќи дека таквите мисли би го попречиле во извршувањето на функцијата.
Американскиот претседател веќе се соочил со неколку обиди за атентат, вклучително и инцидент за време на изборната кампања во 2024 година, кога куршум го зафатил површно.
