Американскиот претседател Доналд Трамп одобрил 30-годишен нуклеарен договор со Саудиска Арабија, со кој на кралството би можело да му се овозможи самостојно да збогатува гориво за цивилни нуклеарни реактори, пренесуваат американски медиуми, повикувајќи се на висок американски функционер.
Според информациите, американски компании ќе обезбедат технологија и експертиза за развој на саудиската цивилна нуклеарна програма, а администрацијата на Трамп планира договорот наскоро да го достави на разгледување во американскиот Конгрес.
Договорот веќе предизвикува загриженост, бидејќи можноста за збогатување ураниум, иако е наменета за цивилни цели, теоретски може да биде чекор кон производство на материјал потребен за нуклеарно оружје. Повеќето држави што користат нуклеарна енергија за цивилни потреби не го произведуваат горивото самостојно, туку го набавуваат од меѓународни снабдувачи под строг надзор.
Дополнителни реакции се очекуваат и поради тоа што договорот, според извештаите, предвидува одредени ограничувања за инспекциите на саудиската нуклеарна програма.
Можниот нуклеарен напредок на Ријад веќе предизвика внимание кај клучните регионални актери. Израел, за кој широко се верува дека располага со нуклеарно оружје, со години внимателно ги следи ваквите иницијативи, додека Иран, главниот регионален ривал на Саудиска Арабија, продолжува да инсистира дека неговата нуклеарна програма има исклучиво цивилна намена.
Дополнителна тежина на договорот му дава и претходната изјава на саудискиот престолонаследник Мохамед бин Салман, кој порача дека неговата земја ќе настојува да развие нуклеарно оружје доколку Иран некогаш произведе нуклеарна бомба.
САД со години се обидуваат да постигнат договор за цивилна нуклеарна соработка со Саудиска Арабија. За време на администрацијата на Џо Бајден, ваквиот договор беше дел од пошироките напори за нормализација на односите меѓу Саудиска Арабија и Израел, но тие иницијативи запреа по нападот на Хамас врз Израел на 7 октомври 2023 година. Администрацијата на Трамп повторно ги интензивираше преговорите, што резултираше со одобрување на новиот договор.
