Американскиот претседател Доналд Трамп ги повика „Шеврон“ и другите големи нафтени компании веднаш да ги намалат малопродажните цени на горивата, оценувајќи дека дел од нивната добивка треба да заврши кај потрошувачите.
Во објава на својата платформа „Трут Соушал“, Трамп ги пофали финансиските резултати на „Шеврон“, но истовремено порача дека целата нафтена индустрија треба да ги намали цените на бензинските пумпи.
„Тоа важи и за другите нафтени компании… Намалете ги цените на горивата за потрошувачите веднаш!“, напиша Трамп.
Неговата реакција следува откако „Шеврон“ објави рекордна квартална нето-добивка од 12,1 милијарда долари, наведувајќи дека високите приходи се резултат и на нарушувањата на глобалното снабдување со нафта поради конфликтот со Иран.
Извршниот директор на компанијата, Мајк Вирт, предупреди дека зголемените тензии со Иран и нападите на Хутите врз саудиската енергетска инфраструктура дополнително го зголемуваат ризикот од нови нарушувања на глобалното снабдување со нафта.
„Сега ризиците не се ограничени само на Ормускиот Теснец, туку се прошируваат и на Црвеното и Црното Море. Заканите за снабдувањето се реални“, изјави Вирт.
Во моментов, просечната цена на бензинот во САД изнесува околу 4,10 долари за галон (3,8 литри), додека цените на премиум-горивата и дизелот во одредени делови од земјата надминуваат пет долари за галон.
