Американскиот претседател Доналд Трамп најмалку седум пати се заканил со масовни напади врз иранска цивилна инфраструктура, а потоа ги одложил или целосно ги откажал во обид да го поттикне Техеран на преговори, објави ABC News.
Според телевизијата, ваквиот модел се повторува од март наваму. Трамп во повеќе наврати најавувал напади врз електрани и енергетска инфраструктура во Иран, но непосредно пред нивното извршување објавувал дека ќе им даде шанса на дипломатските разговори.
Во последниот случај, на 1 август, Трамп соопшти дека се откажува од планираниот напад врз иранската енергетска инфраструктура, наведувајќи дека тоа го прави на барање на Иран и други земји од Блискиот Исток. Истовремено, предупреди дека САД се подготвени да изведат, како што рече, „воен терор каков што не е виден од Втората светска војна“ доколку не се постигне договор.
Сепак, Иран негира дека води директни преговори со Вашингтон. Техеран соопшти дека разговара само со Оман, и тоа за воспоставување привремена безбедна поморска рута низ Ормускиот Теснец.
И покрај повеќемесечните дипломатски обиди, досега не е постигнат траен договор меѓу САД и Иран, а тензиите во регионот и натаму остануваат високи.
