Трамп пред изборите дели по 90 долари на повеќе од 20 милиони Американци

Американскиот претседател Доналд Трамп најави еднократна исплата од 90 долари за повеќе од 20 милиони постари Американци вклучени во програмата Medicare, само еден месец пред изборите за Конгресот.

Парите треба да им помогнат на корисниците да покријат дел од трошоците за премиите за Medicare Part B.

Средствата за исплатата ќе бидат обезбедени од Medicare Improvement Fund, фонд за кој Конгесот обезбедил две милијарди долари.

— реклама —

Според Белата куќа, повеќето граѓани кои ги исполнуваат условите ќе ги добијат 90-те долари директно на своите банкарски сметки на почетокот на октомври.

Оние кои немаат активирано директна исплата ќе добијат чек на адресата што ја имаат регистрирано во системот Medicare.

Сепак, парите нема да ги добијат сите корисници на Medicare Part B.

— реклама —

Не се квалификуваат лицата на кои премиите веќе им ги плаќа Medicaid, како и корисниците кои плаќаат дополнителен износ на премијата поради повисоки приходи.

Исплатата доаѓа еден месец пред изборите за американскиот Конгрес, закажани за 3 ноември, на кои ќе се одлучува за контролата врз Претставничкиот дом и Сенатот.

Републиканците во моментов имаат тесно мнозинство во двата дома на Конгресот.

— реклама —

Ова не е единствената финансиска мерка што Трамп ја најавува во пресрет на изборите.

Минатиот месец американскиот претседател предложи исплата од дури 5.000 долари за секој полнолетен американски државјанин доколку републиканците ја задржат контролата врз Конгресот.

За реализација на таквата мерка би било потребно одобрување од Конгресот, а проценките покажуваат дека таа би чинела околу 1,2 трилиони долари. Предлогот наиде на скепса и кај економисти и кај дел од републиканците.

Администрацијата на Трамп паралелно започнува и со исплата од по 500 долари за речиси еден милион Американци кои купувале здравствено осигурување преку федералниот пазар воспоставен со Законот за достапна здравствена заштита.

Белата куќа тие исплати ги претставува како враќање средства за прекумерно наплатени надоместоци.

Новата исплата од 90 долари ќе опфати значително поголем број граѓани – повеќе од 20 милиони корисници на Medicare.