Трамп пресудата ја нарече „срамна“, најави извршна уредба за нови глобални царини

Врховниот суд на Соединетите Американски Држави пресуди дека претседателот Доналд Трамп го прекршил федералниот закон кога еднострано вовел сеопфатни царини на глобално ниво, оценувајќи дека за таков потег немал соодветно законско овластување.

— реклама —

Одлуката претставува тежок удар за Белата куќа во прашање кое е клучно за надворешната и економската политика на претседателот. Според американските медиуми, станува збор за една од најзначајните пресуди против втората администрација на Трамп.

— реклама —

На прес-конференција, Трамп ја нарече одлуката „срамна“ и најави дека ќе воведе нови глобални царини од 10 отсто преку друга извршна уредба, за која, како што тврди, не е потребна согласност од Врховниот суд.

Поништените „реципрочни царини“ биле воведени повикувајќи се на Законот за меѓународни вонредни економски овластувања од 1977 година, кој му дозволува на претседателот да замрзнува имот и да блокира трансакции во услови на вонредна состојба, но во него не се споменуваат царини како инструмент.

— реклама —

Трамп изјави дека ќе продолжи да ја спроведува својата економска агенда, додавајќи дека постојат „методи, практики, закони и овластувања“ кои, според него, се „дури и посилни“ од механизмите на кои се повикал претходно.

— реклама —

Новата глобална царина од 10 отсто би се вовела врз основа на федерален закон што дозволува вакви мерки во ограничен рок од 150 дена. Доколку Конгресот го поддржи планот, мерката би можела да биде продолжена со законска процедура.